قصيدة موعظة لشاعر الكبير بيبوه ولد الحاج

قصيدة موعظة لشاعر الكبير  بيبوه ولد الحاج

اللي كاطع بيا لســــــــباب== واماسيني فكري محــــذوف

مابيا عني راسي شــــــاب ==ومراكيب الرحيل أوكــــوف

ولاني مخوف من الــعذاب== من ظني فالله المـــــــزروف

الا لفراك مع لحـــــــــباب== ماريت امعاه التــكــــــــيوف

اللي خالك لافت لنــظـــار== ثابت ماهو رد الخــطــــــار

افهذي تيشـــــبط لــــوتـار ==كل انهار اعلينا مــــــعزوف

وامنكش كل انها اظــــفار== من لعمار …ولاهو مخـــــلوف

عالم كارد ذاك المســـــار== شور الدار اللي ما مــعروف

يكان امنو خالك فال دار== والل خالك فالدار الـــــخوف

واللي عاكب لو من لخبار== طابع لو ضيوف الـــــرؤوف

اللي كاطع بيا لســـــباب== واماسيني فكري محــــــذوف

……………………………………………………….

اغفرلي والـــــــــــــــــوالديا== ربي والمومنـــــــــــــين أيا

والمومــــــــــــــــــــنات معيا ==كل امنادم بسمــــو معروف

ولمة محــــــــــــــــــمد كليا ==واللي ما عنــــــــــو تخلوف

ينادى جمـــــــــــــــع وتثنية== مزروف أوراه اسبع صفوف

واجعلني من لســــــــــبقية== فالفردوس ونسمــــع ونشوف

متحكم طه فـــــــــــــــيديا== ماني رجــــــــفان ولامخوف

فالحور انزكـــــــــــــــــنن عينيا== وانطوف اللي نختار انطوف

اللي كاطع بيا لســـــــــــــــــباب== واماسيـــــني فكري محذوف

مابيا عني راســــــــــــــي شاب== وامراكــــــيب الحيل أوكوف

ولاني مخـــــــــــوف من العذاب== من ظــــــني فالله المزروف

ألا لفراك مع لحــــــــــــــــــباب== ماريت معــــــــــاه التكيوف

ربي حد افقلــــــــــــــــــبو ليمان== الراسخ من بــــعث الرحمان

من نساي العـــــــــــصر وشبان== العصــــــــــر افهذي تكالوف

مومن يتــــــــــــــــعطاوه لزمان== ساكن بين الرجــــا والخوف

من كهل الحك هـــــــــــــذا لوان== راسو صوف وظمو مشيوف

نجيهم من ذاك الحـــــــــــصران== ولاطولت اعليهم لـــــوكوف

دخلهم جنــــــــــــــات الرضوان== ما مشيوف اعليهم مشــيوف

هوما محـــــــــــــتاجين الغفران== وانت معروف انــك رؤوف

اللي كاطــــــــــــــــع بيا لسباب== واماسيني فكري مـــحذوف

مابيا عنــــــــــــــي راسي شاب== وامراكيب الرحـيل أوكوف

ولاني مخــــــــــوف من العذاب== من ظني فالله المــــزروف

الا لفراك مع لحـــــــــــــــــباب== ماريت امعاه التـــــــكيوف

ربي وكتن عاد الميـــــــــــــعاد== ما يبــــــــعاد ولاهو منزاد

أغفرلي مجموع الحــــــــــصاد== مسموع الص والل مشيوف

واغفرلي ياسر من لمـــــــــراد== واللف افلعدو والمـــــــفوف

واعطيني ثواب الــــــــــــكرناد== واتلاطيم اعلــــــيه السيوف

اللي ناوي بيه الجـــــــــــــــهاد== ولاتبعاد إلى جيـــت اتشوف

ما عندي مشكل من لعـــــــــباد== فالمحبة والتـــــــعـــــاطوف

ولاني خايف من فارس مـــــاد== فيا من تجاه المصــــــروف

وادعات المحسوبة واتكــــــــاد== امجيـــــــها هي والظـروف

واكعدت اعلى ظهر المـــــيراد== نشابه للطير المــــــــنتوف

ظهري معطوف وبصري عاد== من لحروف اكلــيل ليشوف

كايدني لوكوف ولكـــــــــــعاد== من دهشت لكعاد ولــــوكوف

اعزمت اعلى نيل الـــــــمراد== وادخلت اعلى باب الــرؤوف

يحوشيني صف الحــــــــساد ==واصفوف التالف والـــمتلوف

وانعود افصفوف العــــــــباد== ماعندي شي للــــــــتطروف

والي لي مجموعـــات اكـداد== ما فيهم شي عرضو مكشوف

من اولاد اجواد وتـــــــــلاد== واتخوف وتامر بالمـــعروف

ضد البطش وضد الفـــــساد== وضد المنكر والتـــــــخلوف

هذي هي لجـــــواد الــــكاد== يعود معاها تحـــــــــــــالوف

اللي كاطع بيا لســـــــــباب== واماسيني فكري مـــــحذوف

ما بيا عني راســــي شـاب== وامراكيب الرحـــيل أوكوف

ولاني مخوف من الــعذاب== من ظني فالله الــــــمزروف

ألا لفراك مع لـــــــحـباب== ماريت معاه التكـــــــــــيوف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *