طرائف مقاتل صحراوي : قصة من شبكات التواصل الاجتماعي

عاگب أيام قيلة حتا من عرسي ،تلفن عليا قايد الكتيبة عني فرظ عليا نحظر للموقع ، فوت شهر من تامرة ، تكرفيس ولاقصاف كل ليلة، انواع المأسي وشي ماهو مونك ريتو ، وكنت يلين نتكي ففراشي في الليل وحدي ونبرد راسي نتم نحسب الايام الباگين لي….و نتخيل عني لاهي نرجع ونجبر مولات خيمتي لابسالي نيلة وتيي لي اتاي منعنع على جمر ، هذا الحلم كان كفيل عنو يغير مزاجي وينسيني التعب ….

جيت للخيمتي مغرباية ، گعدت هي على طبلة لابسة نيلة والكيسان مرقوين ونعناع عروشتو مارگين من الكاس لگدامي ، وريحت لبخور مراگة من الگيطون ، وانا لابس كيف اخيار گومي دراعتي ونتبسمو و كيفني لاهي نرد عليها مشاعر الوحشة وشوق دجي جارتها عويشتو رافعة حزامها الى النص تزكي من بعيد فلانة ياافلانة حكلا گولي لفلان “للي هو طبعا انا “عنو يجي يگز لي البلاعة ، الما نطلس وساحت دنيا ، نشتمر ونگيسها ونگز البلاعة و نكمل من الكز وانا نتقاطر من الما ، تخرسني فمها فيها الا ناب ونص ضرس و انا شاك عنها لاهي تشكرني تگولي حكلا يافلان ماجبت شي من لمساويك ، نرجع للخيمة دراعة رقنت ، نفسخ دراعتي ونلبس تشندر ، ونتمسك بمسك زين ونجبرها صبت عاقبي كاس الاشوفتو تنسيك عويشتو ونتمرفگ باغيها ترد عليا شي زين ، دجي اختها تجري وتوكف ورا الباب ماهي باغيا تدخل يبرا حشمانة فلانة ..يافلانة حكلا گولي لفلان لعاد صايب يجي يمرگ راس العتروس من الكور وحل ولا راهو يزكي …

نشتمر وندفع شور الكور ننقذ راس عتروس أنسيب للي لاهي عيد بيه ، بسيف مارگتو مابيا عنو واعر بيا لا ماگديت نوكف حذاه من متن خنزو ، رجعت وللا وگفت في الخيمة وعادت ريحتها الا صنان ، سحمت ولبست خراكيا وتمسكت وريتها صابة كاس يگلع شي عن لخلاگ وكيفني لاهي نخرج نزار قباني داخلي يجي خوها صغير داخل باغي يشاهد الرسوم تكى كيف اخيار گومو ذي هي الاشارة طايرة وبت لليل مولانا نوجه طاسة باش ذا المسخوط يشاهد ولا گدت تتوجه .. ..

تكيت ميت بيا تعب من ذيك الليلة عرفت عن ماخالگ خصوصية في المخيم ،مامحترم حد خصوصية العرسان ، وقررت بالباگي من خلاصي نكري يعملو الا سبوع في الدشرة نتمونك أتاي صالح…..كريت دار مدة 5 ايام ونشرتها وطرحت زكيبة من للحموم وطبلة باش نتمونك اتاي ….ورجعت للمخيم وجبت مولات خيمتي ، نفتح دفة الدار نجبرها برزة ،زگيبة لحموم طارت وطبلة مشات اللا الحمد لله ريت لفراش مال ماخلاو شي!
سلمت أمري لمولانا و رجعت للمخيم ورعاني نوجه طاسة!