شبح الهجرة

معظمنا كشباب نهربو من المخيم من اجل لقمة العيش ، نعيشو حياة الغربة ونكونو أسرة ….يغير وگف..حاني شوي شنهو معنى تتخيم طفلة محترمة ومنت عايلة زينة وتخليها 8 اشهر ولا عام وعامين ماجيتها ولا عطيتها اهم حق من حقوقها زوجية .

شنهو معنى تخلي طفلة حامل وتمشي عنها وتعيش سنة وثنتين في الخارج ودجي اللا حدك تفوت شهر وترجع مالي شور الخارج ،….عندك اولاد خلگو وكبروا ماشافوك….عندك اولاد ماعشت معاهم افضل واخطر ايام عمرهم… شنهو معنى مجيك شهر تتخيم فيه وترجع للخارج مولات خيمتك ماجبرت منك شي…ماعاشت معاك ازين للحظات الزواح …ما عشتو افضل ايام العرس في بدياتو ! وشنهو معنى عنك تكد تعيش في الغربة عامين وثلاثة بدون زوجة ! شنهو للي خليك تعيش سنوات في اوربا وتفرط فعيالك من اجل عنك مانك گاظ لما بنيت وكملت بنايك ! وهذا كامل ضحيتو زوجة صابرة على ابسط حققوقها في زمن كل شي عاد يدعي للرذيلة ! البحث عن الحياة الكريمة والمستقبل المزهر اعمى ياسر من شباب عن أعلياتهم وخلاهم محتاجات وعندهم فراغ عاطفي ومعاه فراغ ثاني وذاك الفراغ لما شبعوه بلحلال حتمال كبير و اراهو كبير حتا يشبعوه بالحرام ! ووگف مع نفسك ….وخرس الى أينتا تروق الرزق على حساب الأهل وزوجة ولاولاد.

سول نفسك كانك متخيم باش تكون أسرة وتعيش معاها افضل ايام حياتك وتعيشو المودة ورحمة للي ذكر مولانا وتربي تركتك تربية صالحة وتعلمهم شي ينفعهم وتخليهم يشفوك القدوة الصالحة وتعيش معاهم ذكريات زينة يلين تكبر ويكبرو او متخيم باش تسافر وتخلي مرأة محتاج لك بكل ماتحمل كلمة من معنى وتركة محتاجينن اب واڨف حذاهم .

انا عارف عن الحياة في المخيم قاسية..وقاسية حتا …يغير الله جعل كلشي بالموازين ..أعدل الكفتين ياصديقي ..خرس لشغلات للي ماتفرط لا في نفسك ولا في عيالك .وأنت عارف فم في قرارات نفسك عن ذوك شغلات خالگين…….وسلام عليكم بقلم: حمودي السالك